Novo número do Guieiro

Poñemos a vosa disposición o novo número do Guieiro, voceiro da Unión da Mocidade Galega, o número 42 correspondente a xullo de 2023.

Nel poderemos atopar os seguintes artigos, Lingua e nación; A suba dos prezos e o papel da mocidade organizada; A crise da vivenda na mocidade; Feminismo galego, incluinte e interseccional, ese é o noso muro contra a transfobia; Coherencia para vencer, e para finalizar o discurso de apertura do XII Congreso da UPG, de Bautista Álvarez.

Proximamente anunciaremos as datas das presentacións deste número en diferentes vilas e cidades ao longo do noso País.

Unha intervención militar estranxeira en Níxer pode incendiar o Sahel

Diante da complexa situación en Níxer, consecuencia do golpe que hai uns días derrocou ao goberno corrupto e pro-occidental de Mohamed Bazoum, a UPG manifesta a súa grande preocupación polas declaracións e actuacións de Francia, EUA e a Unión Europea, anunciando sancións e promovendo unha actuación militar por parte de países veciños membros da Comunidade Económica de Estados da África Occidental (CEEAO); unha actuación dese tipo suporía un baño de sangue de consecuencias impredicíbeis en unha rexión tan sensíbel como o Sahel. Ler máis

Actos de tributo a Moncho Reboiras 2023

A Unión do Povo Galego vai desenvolver como todos os anos, desde fai xa 48, os actos de tributo ao camarada Xosé Ramón Reboiras Noia asasinado pola policía española no ano 1975. Os actos de tributo desenvolveranse o vindeiro sábado 12 de agosto baixo o programa que se anexa.

ACTOS CONMEMORATIVOS:

DODRO.

Cemiterio de Imo.

Ás 12:00h. Ofrenda floral. Intervencións de Xoán Bautista Mariño, portavoz do BNG en Dodro e Manel Casal, Secretario Nacional de Organización da UPG

FENE.

SCDR O Pote, Maniños.

Ás 14:30h. Xantar popular.

Ás 16:30h. Conferencia de Suso Seixo: “A OTAN, ferramenta do imperialismo”
FERROL.

Ás 19:00h. Concentración da Praza de Armas. Saída cara á rúa da Terra onde foi asasinado Moncho Reboiras. Ofrenda floral, intervención de Iván Rivas, portavoz municipal do BNG en Ferrol, e canto da Internacional.

Ás 19:30h. Intervencións Políticas no Cantón.

Mercedes Tobío (Secretariado Político da UPG e Responsábel comarcal do BNG de Ferrolterra)

Paulo Alonso (Secretariado da UMG)

Néstor Rego (Secretario Xeral da UPG e deputado no Congreso)

Ao remate, canto do himno galego.

O lugar do xantar ás 14:30 será nas instalacións da SCDR O Pote de Maniños. O enderezo é: O Pombal, Estrada da Palma 217 Maniños, Fene. Anexamos ligazón coa localización: https://www.google.com/maps/place/ACRD+O+POTE+de+Mani%C3%B1os/@43.4522514,-8.1991662,15z/data=!4m5!3m4!1s0x0:0xa3ca60d015e99358!8m2!3d43.4522514!4d-8.1991662

O prezo do xantar é de 20 € (empanada, arroz con polo, postres, café, viño ou auga) existindo tamén a posibilidade de asistir levando o teu propio xantar. Tanto nun caso coma noutro será preciso anotarse no correo electrónico upg@upg.gal, indicando o nome das persoas e a opción pola que optas. A data límite para se anotar será a quinta feira 10 de agosto.

Recollendo o exemplo do camarada Moncho Reboiras no traballo de autoorganización do povo galego, proclamamos a nosa fidelidade á causa da independencia nacional da Galiza, á que o noso camarada entregou a súa vida, e convidámoste a participar nesta homenaxe.

17 de maio, Día das Letras Galegas, En Galego Aquí e Agora

A plataforma cidadá Queremos Galego sairá ás rúas o 17 de maio para reivindicar a vida en galego.

Desde Queremos Galego convocan mobilizacións en cidades e vilas galegas neste 17 de maio, Dia das Letras Galegas, reivindicando o dereito a desenvolver unha vida plena no noso idioma propio. A plataforma sinala que 40 anos de lei de normalización lingüística non serviron para garantir a presenza e dispoñibilidade do galego en todos os espazos da vida pública. Os avances para a lingua conseguidos pola acción do movemento social pola lingua encontráronse coa pasividade, cando non coa oposición, das institucións, nomeadamente daquelas que teñen obriga de promovela e defendela.

E por iso que reclaman un compromiso firme das administracións, a empezar pola local, coa lingua galega, a que nos une e nos fai existir, non só con celebracións, senón garantindo aquí e agora a súa dispoñibilidade en todos os servizos de competencia municipal con xestión directa ou privatizada, reclamándoo á súa vez en todos os contratos con calquera tipo de fornecedor, e fomentándoo en todos os eidos da sociedade.

Sinalan que a emerxencia lingüística é reversíbel co compromiso de todas e todas, comezando polas institucións que deben asumir as súas obrigas e acompañar unha sociedade cada vez máis activa na normalización da lingua galega.

Animamos ao conxunto da militancia e do pobo galego a asinar no manifesto que Queremos Galego ten na súa web e a participar nestas mobilizacións que se desenvolverán ás 12h do 17 de maio nos seguintes lugares:

• Santiago de Compostela (Alameda)
• A Coruña (Obelísco)
• Lugo (Praza Maior)
• Ourense (Praza do Correxidor)
• Pontevedra (Praza Curros Enríquez)
• Vigo (Cruce Vía Norte)
• Ferrol (Praza do Inferniño)
• Monforte (Praza de España)
• Foz (Casa do Concello)