A UPG parabeniza ao Partido do Traballo de México
A UPG enviou un saúdo ao Partido do Traballo de México, partido co que mantemos relacións de amizade desde hai anos e que integra a coalición “Xuntos faremos historia”, encabezada por Andrés Manuel López Obrador e que gañou as eleccións presidenciais e parlamentarias celebradas en México o pasado domingo.
O texto do saúdo é o seguinte:
ALBERTO ANAYA
PARTIDO DO TRABALLO
DE MÉXICO
Estimado compañeiro:
En nome da Unión do Povo Galego trasladámoslle a vostede e a toda a militancia do Partido do Traballo de México os nosos parabéns polos resultados obtidos o pasado domingo pola coalición Xuntos Faremos Historia nas eleccións celebradas en México.
O triunfo nos distintos ámbitos nos que se celebraban eleccións e a elección de Andrés Manuel López Obrador-AMLO como presidente da república de México, entendemos que son un gran éxito para as clases populares e o conxunto do pobo mexicano e ao tempo son un éxito propio da PT, un partido desde sempre comprometido coa candidatura de AMLO para a presidencia.
Sabemos que teñen vostedes un difícil reto por diante, pero estamos convencidos que a experiencia política da PT, de Morena e de AMLO permitiranlles sortear os obstáculos e paralelamente á posta en práctica das políticas necesarias para construír un novo México empeñaranse na articulación dunha gran alianza social, que lles permita impulsar as transformacións e ao tempo enfrontarse aos sectores reaccionarios que tratarán de impedir que México transite o camiño da soberanía e da xustiza.
Reiterámoslles o noso apoio solidario.
Galiza; 3 de xullo de 2018
Secretaría de Relacións Internacionais
Unión do Povo Galego