A Unión do Povo Galego, UPG, desenvolverá o seu XV Congreso o domingo 16 de febreiro no Pazo de Congresos de Compostela baixo o lema “Autodeterminación para a Galiza existir e avanzar”. Ler máis →
A plataforma cidadá Queremos Galego, composta por máis de 600 entidades, chama a cidadanía galega a mobilizarse nas sete cidades galegas o 19 de decembro, ás 20h, en resposta á situación de emerxencia lingüística que amosan con claridade datos como os do IGE e para reclamar que a Xunta cumpra coas demandas realizadas polo Consello de Europa.
O lema da convocatoria será Emerxencia lingüística. Precisamos do galego , e terá lugar nas 7 cidades galegas simultáneamente. Marcos Maceira, voceiro de Queremos Galego e presidente da Mesa pola Normalización Lingüística, sinala que “a evolución dos datos de uso e coñecemento do galego son alarmantes”.
As taxas de incapacidade para falar galego entre a poboación menor de 15 anos son as máis altas da historia, consolídase a ruptura interxeracional e aumenta o número de persoas que se senten na obriga de mudar de lingua.
Diante desta situación, Queremos Galego vén denunciando reiteradamente os incumplimentos da Xunta, confirmados agora polo Comité de expertos e polo Comité de Ministros do Consello de Europa.
Recorda Maceira que “a única política da Xunta é a agresividade e, segundo os expertos do Consello de Europa, incumprir a Carta e non realizar ningunha acción lexislativa ou política para o facer, nomeadamente no ámbito do ensino”.
Apunta Maceira que “se Feixó tivese un mínimo de respecto por Galiza e pola institución que representa xa tería derrogado hai anos o decreto contra o galego”. A plataforma lembra que o informe dos expertos non só afecta á Xunta. O Estado ten que garantir o cumprimento da Carta que el mesmo ratificou, nomeadamente nos ámbitos que son da súa competencia.
Neste sentido, a entidade recorda que as dificuldades de uso do galego na xustiza ou na administración xeral do Estado deben ser resoltas, comezando por garantir o coñecemento de galego de todo o funcionariado estatal destinado en Galiza.
Dende a UPG unímonos a estas concentracións, e chamamos a participacións nelas para plantar cara as políticas anti-galegas do PP.
A Federación de Asociacións Culturais Galegas “Galiza Cultura”, inaugura o vindeiro 11 de decembro ás 17:30 a súa exposición Nós de onte a hoxe: 100 anos de historia no Museo do Pobo Galego (Compostela).
Galiza Cultura conmemora así o centenario dunha iniciativa singular e decisiva na historia contemporánea da Galiza: o nacemento da revista Nós, cuxo primeiro número ve a luz o 30 de Outubro de 1920, revista de alta cultura que coloca a lingua, as artes e a ciencia galega nun nível privilexiado de calidade.
Unha publicación que é herdeira directa do espírito das Irmandades da Fala (1916), do renacido boletín A Nosa Terra (1917) e da I Asemblea Nacionalista de Lugo (1918), que son os seus antecedentes directos.
A exposición é un percurso pola significación e a obra dos seus principais persoeiros Vicente Risco, director literario; Castelao, director artístico; Ramón Otero Predaio ou Ánxel Casal, e estará no Museo do Pobo Galego até o 25 de xaneiro de 2020.
Galiza vai ter voz propia no Estado da man do BNG una vez logrado un escano pola provincia da Coruña nas eleccións xerais deste domingo que será ocupado por Néstor Rego. Ler máis →
A plataforma Vía Galega, que integra máis de 50 entidades sociais e culturais en defensa dos dereitos nacionais de Galiza, presentou a campaña “Non emigramos, expúlsannos. Soberanía para crear traballo digno”.
A iniciativa comezou onte cunha charla na Facultade de Xeografía e Historia da USC, na que denunciaron a marcha por motivos laborais de 216 mil persoas de Galiza na derradeira década, das que 80 mil eran menores de 30 anos.
Até o 14 de decembro, cando rematará a campaña con actos en todas as vilas e cidade, haberá mocións en todos os concellos, vídeos, charlas nas universidades e un manifesto.
A portavoz de Vía Galega, María Xosé Bravo, sinalou durante a presentación da iniciativa que “estamos nun país con talento e potencialidades que cómpre poñer en valor, porque é necesario concibir o feito da emigración galega como unha emerxencia nacional que precisa políticas que aseguren un traballo digno na nosa terra, con defensa da base produtiva e dunha economía auto centrada que mobilice todos os recursos para xerar emprego e riqueza na Galiza”.
Tamén trasladou a solidariedade en nome de Vía Galega aos presos e presas políticas cataláns e ao pobo de Catalunya, ademais de mostrar o rexeitamento “a esa sentenza profundamente inxusta”.
A plataforma “Por un monte galego con futuro”, conformada por máis de 20 organizacións como a CIG, FRUGA ou ADEGA, organiza este domingo 20 de outubro unha manifestación nacional en Compostela, que partirá ás 12 da mañá da Alameda.
Con esta mobilización a plataforma esixe ao goberno galego e estatal que se efectúe unha planificación específica para o monte galego que teña en conta a perda acelerada de biodiversidade do noso monte, o que aumenta os efectos provocados pola mudanza climática como o incremento do número e extensións dos lumes forestais.
A plataforma cuestiona tanto o borrador da Estratexia Galega contra o Cambio Climático como o Plan Forestal que tramita a Xunta de Galiza, nese sentido o secretario xeral da CIG rexeitou este modelo de “capitalismo voraz” que intensifica, en Galiza, un “espolio de corte colonial” dos noso recursos e materias primas como o que promove, ademais, a chamada Lei de Depredación “sen importarlle o dano social e medio ambiental que produce”. Por iso defendeu un outro modelo que favoreza que nese 94% do noso territorio se poida crear “riqueza social, emprego e industria” baixo parámetros de sustentabilidade e respecto ao medio ambiente.
No que atinxe o Plan Forestal, Belén Rodríguez de ADEGA reclamou que se elabore un novo documento que siga, como principios reitores, a diversidade de hábitats e especies, a multifuncionalidade de uso, o fomento do arborado autóctono e unha moratoria do eucalipto, o mantemento dos servizos ecosistémicos, a non privatización dos montes veciñais, e a creación de emprego e a sustentabilidade económica e social.
Dende a UPG chamamos a saír a rúa o vindeiro domingo para impulsar as propostas concretas que permitan a Galiza loitar contra o proceso de mudanza climática e encamiñarse cara unha transición ecolóxica cada día máis urxente.
Remataron as sesións do Foro Internacionalista da UPG levadas a cabo o 4 e 5 de outubro en Compostela e Vigo respectivamente.
Nesta edición, “Brasil baixo o goberno Bolsonaro, perspectivas da esquerda”, centrámonos na situación do país latinoamericano coa axuda de Moara Crivelente, da Comisión de Relacións Internacionais do PCdoB- Partido Comunista do Brasil.
Antes de comezar as sesións Crivelente reuniuse cunha delegación do Secretariado da UPG, para compartir as experiencias das comunistas brasileiras e galegas.
Nos actos celebrados en Compostela e Vigo a camarada do PCdoB fixo un repaso da actualidade política brasileira, e dos esforzos dos movementos sociais por plantar cara a un goberno que non só acabou coas conquistas sociais do pobo brasileiro no goberno de Lula da Silva, senón que foi aínda máis alá, dificultando que unha vez remate o goberno de extrema dereita dirixido por Bolsonaro estes cambios poidan ser revertidos.
Tamén apuntou aos grandes medios de comunicación de masas coma executores da campaña contra Lula e o Partido dos Traballadores, que levaron a un congresista de segunda fila coma Bolsonaro a acadar a presidencia de Brasil con postulados militaristas e favor da ditadura, porén o desprezo que os militares senten por el pola súa pésima folla de servizos na súa época coma soldado.
Asemade, Crivelente sinalou que a onda de esquerdas en Latinoamérica non rematou, e amosouse confiada nun novo impulso a nivel continental que lles permita continuar a ser referenciais nas vindeiras décadas.
Esta semana teremos unha nova edición do Foro Internacionalista da Unión do Povo Galego, centrado na situación política no Brasil de Bolsonaro co título “Brasil baixo o goberno Bolsonaro, perspectivas da esquerda”.
A primeira xornada terá lugar en Compostela na quinta feira 3 de outubro ás 20:30h no Espazo enocultural VIDE, VIDE! (rúa da Fonte de Santo Antonio, 10 Baixo), e no que intervirán: Duarte Correa, Secretario de Relacións Internacionais da UPG e Moara Crivelente, da Comisión de Relacións Internacionas do Partido Comunista do Brasil (PCdoB).
A segunda xornada desenvolverase en Vigo na sexta feira 4 de outubro ás 20:00h no Café de Catro a Catro (rúa Girona, nº 16), contando coa presenza de Manuela Rodríguez Pumar, Secretaria de Organización de Vigo da UPG, Moncho Boán, Ex-responsábel da Sección internacional da CIG, e Moara Crivelente do PCdoB.
Desde a Unión do Povo Galego convidámoste a asistir a este foro onde poderás coñecer sen deturpacións a situación do Brasil baixo un goberno de extrema dereita.
Entre 20 e 27 de setembro decorren en varios países do mundo accións para protestar contra a crise climática global. Na Galiza, as manifestacións previstas contan co apoio do Bloque Nacionalista Galego. No pasado 12 de setembro o BNG presentou unha batería de medidas para loitar contra o cambio climático no noso País, ao tempo que anunciaba a súa presenza nas accións organizadas.
Na súa proposta o BNG defende ir máis alén de medidas cosméticas e declarativas e deixar de pór o foco na responsabilidade individual das persoas, con solucións voluntaristas e desideoloxizadas, para exixir a actuación decidida dos verdadeiros responsábeis: os estados e os grandes conglomerados económicos e industriais que estes amparan. O problema non é individual, é sistémico. Un sistema, o capitalismo, depredador nato de recursos que á custa dos privilexios dunha minoría practica constantes agresións ao medio co grave deterioro ambiental, para alén de xerar desigualdades económicas e sociais, opresións nacionais e de clase e violencia social, como mostran os centos de asasinatos anuais de persoas que encabezan os movementos contra as grandes empresas que contaminan a súa terra e os seus ríos.
Por isto, se quixermos encontrar solucións a un desafío como a mudanza climática non podemos pór o foco nas consecuencias que xera senón nas causas que nos levan cara a un planeta inhabitábel.
No que atinxe a Galiza, a nosa inserción colonial no Estado Español condénanos a unha economía extractiva orientada a non achegar case valor engadido a esta produción, o que deriva nuns altos custos medio ambientais e nuns baixos beneficios sociais para o país.
Compre ter en conta que o debate sobre a emerxencia climática é un terreo cheo de posturas cosméticas, en que as mesmas empresas que contaminan e os partidos políticos que as avalan pretenden asociarse á moda do verde, do sustentábel, da economía circular, mais sen ir ao fondo da cuestión para non pór en perigo os seus intereses económicos e os seus lucros. Cómpre, pois, menos declaracións e máis actuacións prácticas. En calquera caso, somos conscientes que a verdadeira solución á crise climática pasa acabar co capitalismo depredador, por mudar o sistema social e económico e por construír na Galiza e no mundo sociedades xustas, igualitarias e libres.
A UPG chama a encarar con decisión as causas da crise climática e a que as mobilizacións a realizar sirvan sempre para desmascarar os verdadeiros responsábeis. É preciso, aliás, centrar a atención nas solucións á crise ecolóxica da Galiza ao tempo que contribuímos para as solucións globais e para a abrir os camiños que contribúan para que outros países poidan buscar as solucións mais adecuadas a súa situación. De pouco serviría preocuparse do Amazonas se desatendésemos o combate noso País á depredación ambiental, á megaminaría contaminante ou á actuación de empresas como ENCE que, coa complicidade do Partido Popular, degradan o noso medio natural para garantir os seus lucros.
O luns 16 de setembro será o II cabodano do falecemento de Bautista Álvarez. O día previo, o domingo 15 de setembro, ás 12 do mediodía, no cemiterio de San Cibrao das Las, no concello de San Amaro, a Fundación Terra e Tempo e a Unión do Povo Galego organizan unha ofrenda floral para lembrar a súa memoria e o seu importante contributo para coa Galiza e as súas clases traballadoras. Pronunciará unhas palabras o camarada Antón Sánchez Ribeiro, amigo e compañeiro político de Bautista. Ler máis →
