O BNG comeza o novo curso político en Carballo

O Bloque Nacionalista Galego arranca o curso político cun acto en Carballo o vindeiro 14 de setembro. O escenario será o parque de Anllóns, a carón do Pazo da Cultura de Carballo, a partir das 12 da mañá.

No acto intervirán representantes de distintos colectivos sociais de todo o País, ademais de Evencio Ferrero, alcalde de Carballo, e Ana Pontón, portavoz nacional do BNG.

Desde a UPG chamamos a participar neste acto, que da comezo a un curso político no que o BNG se presenta como a alternativa real para a clase traballadora e o conxunto do pobo galego.

A UPG lembra a Moncho Reboiras e o seu compromiso militante

Coma cada 12 de agosto desde hai 43 anos, rendemos homenaxe o noso camarada Xosé Ramón Reboiras Noia, asasinado en 1975 pola policía española no número 27 da Rúa da Terra, en Ferrol.

A homenaxe comezou as 12 da mañá no cemiterio de San Xoán de Laiño, en Imo (Dodro), coas intervencións de Xoán Bautista Mariño, concelleiro do BNG en Dodro, e Xosé Manel Casal, secretario de organización da UPG, que lembraron o compromiso do camarada Moncho Reboiras, e depositaron unha coroa de flores na súa memoria.

Despois do xantar na SCRD Agarimo de Sillobre -Fene- Pilar García Negro impartiu a palestra “Lingua galega: todo pasa por ela”. Pouco despois, ás 19:00 comezou a concentración na Praza Armas en Ferrol, dirixíndose ó 27 da Rúa da Terra, onde se fixo unha ofrenda floral e se cantou a Internacional.

Ás 19:30 comezou o acto central no Cantón coa intervención de Alberte Mera, director da primeira longametraxe sobre Moncho Reboiras, producida pola Fundación Terra e Tempo e que se atopa nun proceso de micromecenado para conseguir o financiamento preciso.

Seguiuno Mercedes Tobío, responsábel do BNG na comarca de Ferrolterra, que deu a benvida ás asistentes a cidade de Ferrol; e Pablo Ríos “Kai”, Secretario Xeral da Unión da Mocidade Galega, que percorreu a traxectoria exemplar de Moncho Reboiras antes de presentar a Néstor Rego, Secretario Xeral da UPG.

“O tempo veu constatar que as nosas análises eran e continúan a ser acertadas. Ou hai autoorganización ou hai sucursalismo, que só reforza a españolización da Galiza. E o traballo realizado con coherencia e confianza no noso povo acaba por dar resultados” proclamou o noso Secretario Xeral, que fixo énfase na importancia da autoorganización, “a única garantía de podermos decidir, de maneira libre, en función dos propios intereses como nación”.

Máis un ano, desde a UPG recollemos o exemplo de Moncho Reboiras e proclamamos a nosa fidelidade á causa da independencia nacional da Galiza, á que o noso camarada entregou a súa vida.

Galería de fotos da homenaxe a Moncho Reboiras

Tributo a Moncho Reboiras no 44 aniversario do seu asasinato

A Unión do Povo Galego (UPG) vai desenvolver como todos os anos, desde fai xa 44 anos, os actos públicos de tributo a Xosé Ramón Reboiras Noia o vindeiro 12 de agosto, segunda feira, baixo o programa que de seguido damos conta:


ACTOS CONMEMORATIVOS:

DODRO.

Cemiterio de Imo.

Ás 12:00h. Ofrenda floral.

FENE.

SCDR Agarimo, Sillobre. (1)

Ás 14:30h. Xantar popular. (2)

Ás 16:30h. Conferencia de Pilar García Negro: “Lingua galega: todo pasa por ela”

FERROL.

Ás 19:00h. Concentración da Praza de Armas. Saída cara á rúa da Terra onde foi asasinado Moncho Reboiras.  Ofrenda floral e canto da Internacional.

Ás 19:30h. Intervencións Políticas no Cantón.

Mercedes Tobío (Responsábel comarcal do BNG de Ferrolterra)

Paulo Ríos (Secretario Xeral da UMG)

Néstor Rego (Secretario Xeral da UPG)

Ao remate, canto do himno galego.

Nestes momentos en que é máis necesario que nunca defender un proxecto político nacionalista,  recollemos o exemplo do camarada Moncho Reboiras no traballo de autoorganización do povo galego e proclamamos a nosa fidelidade á causa da independencia nacional da Galiza,  á que o noso camarada entregou a súa vida, e convidamos o conxunto do povo galego a participar con nós nesta homenaxe.

 

(1)  O lugar do xantar ás 14:30 será nas instalacións da SCDR Agarimo de Sillobre. O enderezo é: Mestre Lois Rodríguez, 1-3 – SILLOBRE – 15509 – Fene. Anexamos mapa e foto aérea.

A Localización: https://www.google.com/maps/place/S.C.R.D.+Agarimo+de+Sillobre/@43.4721981,-8.1763155,14.79z/data=!4m5!3m4!1s0xd2e753998e0434d:0xbe5193228ef6b4a3!8m2!3d43.4777162!4d-8.1470785

(2)  O prezo do xantar é de 15 € e será preciso anotarse no correo electrónico upg@upg.gal, indicando o nome das persoas. A data límite para se anotar será a quinta feira 8 de agosto. O menú será o seguinte: Empanada, churrasco con cachelos e ensalada, postre, cafe e viños do país.

Primeira longametraxe sobre Moncho Reboiras

As vindeiras semanas comeza a rodaxe do primeiro filme sobre a vida do noso camarada Moncho Reboiras, derradeira vítima do franquismo en Galiza, após o seu asasinato en agosto de 1975.

A película Reboiras. Acción e corazón, estará dirixida por Alberte Mera e producida pola Fundación Terra e Tempo de Estudos Nacionalistas. A data prevista para a estrea é o 2020, cando se cumpren 45 anos da súa morte. O filme levará á pantalla un retrato fiel construíndo a vida de Moncho Reboiras desde a vertente humana e política.

Para este proxecto contan con testemuños de distintas persoas que o coñeceron e partillaron tempo con el, e que vertebran o proceso da toma de conciencia social e nacional por parte de Reboiras que o levaron a involucrarse activamente na Unión do Povo Galego para enfrontar a ditadura e conseguir unha Galiza libre e xusta.

No tocante o financiamento, a Fundación Terra e Tempo vén de anunciar unha campaña de micromecenado activa dende o 1 de agosto para acadar os 20 mil euros precisos para rodar a película.  Todas aquelas persoas que desexen colaborar economicamente coa realización do filme poden facelo a través da páxina web www.reboiras.gal ou directamente nesta ligazón, e serán consideradas como “participantes do filme”, sendo nomeadas como tal nos créditos e recibirán información puntual sobre os avances dos traballos, así como diversos agasallos en función da cuantía da doazón.

Dende a UPG damos a benvida a este novo filme sobre a nosa historia; un elemento imprescindíbel para o coñecemento dos sacrificios que Moncho Reboiras e outras tiveron que facer para construír moitas das ferramentas coas que hoxe en día conta o povo galego para lograr unha Galiza libre e socialmente xusta. Animamos a colaborar activamente na campaña de micromecenado para lograr a realización desta importante obra fílmica.

Día da Patria 2019: A UPG chama a participar nos actos do BNG dunha forma masiva

Achégase o 25 de xullo, Día da Patria Galega, cunha ampla axenda que comezou o pasado 15 de xullo coa Semana da Patria, con actos por todo o territorio nacional.

A nivel nacional comezan os actos na capital no 24 de xullo, coa Homenaxe a Rosalía e Castelao no parque de Bonaval a partir das 17:30, organizada por Galiza Nova con diversas actuacións musicais. Alí mesmo comezará ás 19 horas a III Ruada pola Independencia. A noite é tempo de Festigal no Campus Sul con concertos para todos os gustos: Brassica Rapa, De Ninghures, Banda Bassotti, Arrhythmia.

O 25 de xullo chega o acto central desta celebración coa manifestación nacional que sae ás 12 da mañá da Alameda cara a Praza da Quintana, onde intervirá Ana Pontón, Portavoz Nacional do BNG.

Despois do xantar popular na carballeira de San Lourenzo é a hora da cultura, con presentacións literarias, obradoiros ou ludoteca para as cativas, ademais dos postos de artesanía. Ás 18:30 horas presentarase o novo volume da revista Terra e Tempo, co monográfico Resistencia e expansión cultural. Crónica do movemento cultural galego na ditadura (1961-1976), que recolle artigos de 25 entidades culturais elaborados por 32 autoras e autores. O colofón porano o café concerto desde as 17 horas, coas Pandereteiras de Verducido, DudeCan e Güintervan.

Nesta data, 51 anos despois da convocatoria da UPG que levou a restaurar a celebración do Día da Patria, facemos un chamamento á clase traballadora e ao conxunto do pobo galego a participar masivamente nos actos do BNG, coa convicción de que o seu éxito consolidará a alternativa que vai mudar as cousas no noso País.

Fortalecer o nacionalismo popular a camiño da soberanía

Análises e resolucións do Comité Central do Partido reunido no mes de novembro

Nos últimos dous anos o BNG deu pasos importantísimos para reafirmar socialmente o perfil nacionalista, asentar -no mínimo no noso campo- o principio da autorganización e unha práctica en coherencia, consolidar a unidade interna, recuperar iniciativa e iniciar tamén a recuperación de apoios sociais e electorais… Con todo, este camiño de recuperación e avance do nacionalismo non estivo nin está exento de dificultades, quer polas circunstancias externas quer polas nosas propias debilidades. Sobre as primeiras debemos sempre tentar actuar para vencelas. No que ten a ver coas segundas temos a firme determinación de contribuír para superalas o antes posíbel, pois esa é a premisa para podermos avanzar.

É por iso que, nun momento especialmente complexo, tanto por razóns obxectivas como subxectivas ou de conciencia social, en que o nacionalismo ten importantes obxectivos políticos, sociais e electorais no horizonte, debemos estar especialmente preocupados por acertar na maneira de encaralos para lograr que redunden en aumento da organización, da conciencia nacional e do apoio social ao movemento nacionalista.

Nese sentido, os procesos electorais que temos pola frente son unha boa oportunidade para incidir na actividade de organización social, para alargar a organización e a presenza do nacionalismo. Tamén para a clarificación da situación política do País, pois é claro que, polo contexto en que se producen, estas as eleccións municipais van máis alá dun proceso puramente local. É, pois, fundamental incentivar o debate político e ideolóxico e a defensa de alternativas que, referidas á modificación da realidade actual da Galiza, vaian acompañadas ou situadas dentro dunha estratexia que contemple obxectivos máis a longo prazo e que signifiquen contradición ou ruptura co marco vixente.

Entendemos que é preciso facer incidir o discurso especialmente na necesidade dunha forza política nacionalista, denunciando coa máxima claridade e contundencia a onde levou a política de unidade coa esquerda española: anular a presenza de Galiza como nación na política estatal, crear máis abulia e desnacionalización dentro e incitar a deixar o futuro de Galiza nas mans de fóra. O discurso forte do nacionalismo, con linguaxe clara e en chave galega é a mellor maneira de evidenciar que hai política diferente e propia, que non é asimilábel a ningunha outra.

As próximas eleccións europeas permitirán ao nacionalismo dar un paso nunha liña de acción que debe ter continuidade no futuro: a articulación dunha alianza política -con perspectiva de permanencia- das forzas soberanistas da Galiza, Euskalherria e Cataluña, co obxectivo de fortelecer os movementos de liberación nacional das tres nacións. A crítica ao que representa a UE como alianza ao servizo dos intereses das oligarquías e do imperialismo e frente a iso a soberanía das nacións e os intereses populares debe constituír o eixo da actuación política do nacionalismo neste ámbito.

No que atinxe o traballo político e social nos próximos meses, debemos ter presente que o nacionalismo ten en andamento importantes obxectivos políticos e sociais, para alén dos electorais, que non debemos deixar nunca de lado, pois se os lograrmos concluír con éxito permitirán maior capacidade de influencia e o avance das posicións nacionalistas na sociedade galega. Alén diso, debemos procurar axustar adecuadamente na práctica política o xogo entre táctica e estratexia. Deixando sempre claro a defensa do dereito de autodeterminación e que o noso obxectivo estratéxico é unha República da Galiza soberana, debemos promover actuacións tácticas que cuestionen a submisión a Madrid e o impasse político en que a Galiza está ancorada, aínda que sexa só para provocar un debate social que evidencie as contradicións das forzas de obediencia española e as limitacións dun rexime político incapaz de aceptar a mínima mudanza positiva. Nesa mesma liña, contribuír activamente para organizar o descontentamento social contra as políticas antisociais e antigalegas do rexime español, fortalecendo a mobilización social debe ser unha preocupación permanente do noso traballo militante.

Aliás, debemos estar preparados para un deterioro da vida económica, social e política no Estado español aínda maior, que poda afectar a nosa actuación social e institucional. Tamén para a probabilidade de se produciren escenarios de conflitividade política que anulen ou desvirtúen aínda máis o valor da presenza nas institucións. É claro que estamos asistindo a un auxe público das posicións ultra-reaccionarias, avivadas pola apoteose de españolismo promovido polas forzas do rexime, que coloca o debate político no Estado español nunha vía de irracionalidade e de exasperación represiva que aínda se pode agravar. Eis máis unha razón para tentar fortalecer todo o posíbel a nosa estrutura de presenza, influencia e intervención social, para podermos mellor responder e encarar os desafíos que veñan por diante.