Contra a agresión imperialista ao Irán. Non á guerra
A Unión do Povo Galego condena o ataque perpetrado polos Estados Unidos e o Estado sionista de Israel contra a República Islámica do Irán.
A agresión iniciada no pasado sábado, e que continúa neste momento, veu precedida dunha campaña de manipulación e intoxicación informativa ao respecto de supostas intencións agresivas do Irán, cando a realidade é xusto a contraria, pois en ningún momento o goberno iraniano mostrou intención de abandonar as reunións e negociacións diplomáticas que veñen de saltar polos ares con este ataque. A intervención militar converteuse nunha declaración de guerra total co asasinato premeditado do principal líder do estado iraní e doutros importantes dirixentes.
Máis unha vez, o imperialismo inventa escusas para ocultar o seu verdadeiro obxectivo, que non é outro que controlar as reservas dun dos maiores produtores de petróleo do planeta e eliminar un réxime político que defende a súa soberanía e non se dobra diante das imposicións imperialistas dos EUA.
Denunciamos que se invoque, para levar adiante a agresión, o suposto perigo de que o Irán posúa capacidade para construír armas nucleares, cando é sabido que en Oriente Medio só Israel posúe ese tipo de armamento, negándose ademais a ser inspeccionado pola Axencia Internacional da Enerxía Atómica.
O ataque ao Irán é un paso máis na escalada dos EUA e do seu títere na zona, o estado de Israel, para desestabilizar permanentemente unha rexión do planeta dunha enorme importancia estratéxica tanto polos seus recursos enerxéticos como pola súa situación xeográfica, e eliminar todos aqueles que se opoñan aos seus designios. Vímolo recentemente en Siria e vémolo diariamente co xenocidio do pobo palestino e coas agresións contra o Líbano, perpetradas coa complicidade de moitos estados do norte global e a inutilidade das institucións internacionais.
No mesmo sábado puidemos comprobar como, máis unha vez, a Unión Europea exerce o papel de simple mascota obediente ás ordes dos EUA, condenando a resposta defensiva do agredido mentres pedía contención aos agresores nos seus ataques.
A UPG defende o dereito de todo pobo a exercer a soberanía e a construír un futuro propio sen inxerencias, sexan directas ou indirectas.
É sempre necesario loitar pola paz, mais, neste momento, cando o imperialismo consciente da quebra da súa hexemonía ataca terceiros países obviando todas as regras que el mesmo tiña imposto, é máis necesario do que nunca levantar un amplo movemento social contra a guerra, o belicismo, e pola construción dun mundo en paz, en que as discrepancias se resolvan por medio do diálogo e a cooperación.
Facemos un chamamento ao pobo galego a se mobilizar coa Plataforma Galega pola Paz, contra a agresión a Irán, contra a guerra imperialista e por un mundo en paz.
