1º de maio. Fortalecer a mobilización en defensa dos dereitos da clase traballadora galega

Vivimos nun contexto social e político especialmente complexo, que implica enormes apertos económicos para os sectores populares e, especialmente, para a clase traballadora galega. Ás consecuencias da pandemia e das políticas económicas desenvolvidas nese período vén a sumarse a guerra de Ucraína que, para alén das repercusións propias dun conflito bélico e as súas derivadas no ámbito político, ten como efecto agravar os problemas económicos que xa viñamos sufrindo, até provocar unha situación de escalada descontrolada dos prezos que ocasiona crecentes dificultades e empobrecemento das clases populares do noso país.

Todo isto, no medio dunha acción ineficaz dun Goberno español que non está disposto a adoptar medidas que poñan en cuestión os intereses dos grandes poderes económicos, e que non dubida en permitir o asalto ás rendas do traballo para salvagardar as rendas do capital.

Estamos a falar dunha situación que levará, sen dúbida, a agudizar a ofensiva antisocial, o que necesariamente nos obriga a reaxir de maneira rápida e contundente. É necesario acentuar -na rúa e nas institucións- a oposición ás políticas antisociais que está a desenvolver o Goberno español: reforma das pensións que consolida os aspectos máis lesivos das anteriores, non derrogación da reforma laboral, mantemento da Lei da Mordaza, reacción insuficiente –cando non complicidade coas grandes enerxéticas, como aconteceu coas eléctricas- frente á escalada brutal de prezos que empobrece as clases populares, anuncio do aumento do gasto militar de 0,9 a 2% do PIB, políticas belicistas ao mandado da OTAN…

E cómpre reaxir tamén frente á inacción dunha Xunta da Galiza ausente que, nunha situación excepcional de crise, renuncia a exercer de verdadeiro goberno galego adoptando medidas necesarias e posíbeis no ámbito das súas competencias e só parece preocupado en resolver a substitución de Feixóo, mais sen tocar o nefasto legado que deixa en recortes sociais, privatización e precarización de servizos públicos, crise industrial e demográfica, emigración, etc.

Debemos, aliás, activar a mobilización desde a conciencia de que, se non houber unha oposición a estas políticas desde o soberanismo e a esquerda, a decepción e descontento que xeran podería ser capitalizado pola demagoxia e o populismo da ultradereita españolista, que non dubida en se presentar como anti-sistema cando na realidade son o último baluarte de salvagarda do sistema.

Por todo isto, a Unión do Povo Galego (UPG) anima toda a militancia nacionalista e as clases populares do noso País a participar nos actos que o sindicalismo combativo, nacionalista e de clase (CIG) ten convocados para este 1º de maio como mellor maneira de lle facer frente á actual situación que padecemos e fortalecer unha alternativa nacional e popular na Galiza.

‘Galiza pola Paz’, mobilizacións nas sete cidades este domingo 20 de marzo

A plataforma ‘Galiza pola Paz’, unha resposta galega ante o conflito bélico que se está a dar na Ucraína e composta por máis de 30 organizacións e colectivos, entre eles a UPG, convoca mobilizacións simultáneas, ás 12:00 horas, nas sete cidades para o vindeiro domingo día 20 de marzo, reclamando a fin da guerra e a aposta pola vía diplomática para resolver o conflicto.

A plataforma reitera o máis enérxico rexeitamento á intervención militar rusa en territorio ucraíno, reclamando a retirada inmediata das tropas rusas.  Expresando ademais a plena solidariedade co sufrimento do pobo ucraíno e o de Donestk e Lugansk, e cos xa millóns de refuxiadas e refuxiados que está a provocar este conflito.

Volta á diplomacia

Xunto a isto fai un chamamento ao cesamento das accións de guerra e á volta á diplomacia como única vía para a resolución deste conflito. Nese sentido cómpre atopar o camiño para unha desescalada militar e unha política de paz, o que require apostar no diálogo, nos esforzos diplomáticos e no marco de organizacións como a ONU ou a OSCE, para lograr unha solución estábel sobre a base do respecto á soberanía dos pobos e a paz. Reclama o compromiso da non incorporación de Ucraína á OTAN, en consonancia cos acordos de Minsk, así como o recoñecemento das repúblicas populares de Donestk e Lugansk, respectando a súa vontade democrática.

Ler máis

Mobilizacións este domingo 30 de xaneiro para esixir a derrogación real das reformas laborais

Para este domingo 30 de xaneiro a CIG convoca unha xornada de mobilizacións nas sete cidades e en Vilagarcía, Viveiro, Ribeira e Cee, en rexeitamento á fraude que supón a nova reforma laboral e para esixir a derrogación das reformas impostas dende o ano 2010. Ademais, o día que se celebre o Pleno do Congreso no que se convalide o RD/lei 32/2021, que previsibelmente será o 3 de febreiro, a CIG tamén se concentrará diante Delegación do Goberno na Coruña e nas Subdelegacións de Pontevedra, Ourense e Lugo.

Ademais, esta xornada de mobilizacións do domingo 30 vaise desenvolver de xeito conxunto en Galiza, Euskal Herria e Catalunya en resposta ao novo ataque á clase traballadora que supón esta reforma laboral que significa maior precariedade e o aumento da centralización da negociación colectiva.

Horas e lugares das mobilizacións
  • A Coruña: ás 12h, na Praza de Vigo.
  • Ferrol: ás 12h, no local sindical CIG na Avda. do Esteiro.
  • Lugo: ás 12h, no Edificio Sindical (Ronda da Muralla).
  • Ourense: ás 11.30h, no Edificio Sindical (Parque de San Lázaro).
  • Pontevedra: ás 12h, na Praza da Ferrería.
  • Santiago de Compostela: ás 11.30h, na Praza Roxa.
  • Vigo: ás 12h, desde a Dobrada.
  • Vilagarcía: ás 12h, na Casa do Mar.
  • Viveiro: ás 12h, na Praza do Concello.
  • Ribeira: ás 12h, na Praza do Concello.
  • Cee: ás 12h, diante do Concello.

Non á fraude da nova reforma laboral

Coa aprobación do RD/Lei 32/2021, o Goberno de PSOE e Unidas Podemos incumpriu a promesa que tantas veces anunciara, posto que non se derroga a reforma laboral de 2012 imposta polo PP.

No acordo do “diálogo social” do que emana esta nova normativa, tanto o Goberno como UGT e CCOO pregáronse aos intereses da patronal. O pacto social evidénciase unha vez máis como o enterrador dos dereitos dos traballadores e das traballadoras. O texto desta nova reforma, ademais de manter as medidas máis lesivas da do PP, incorpora outras novas que favorecen o empresariado á conta, outra vez, da clase obreira:

  • O despedimento segue a ser igual de fácil e barato e mantense a barra libre das empresas para os despedimentos colectivos.
  • Non se recuperan os salarios de tramitación nos despedimentos improcedentes.
  • Non se recupera a nulidade dos despedimentos en fraude de lei.
  • Segue en vigor o 10% da desregulación da xornada laboral.
  • Incorpóranse novos contratos de formación e temporais, e modalidades de ERTE, que afondarán na precariedade. Ademais, créase unha nova modalidade de traballador/a precario/a baixo o novo contrato fixo-descontinuo.
  • A nova modalidade de ERTE facilita o traspaso de cartos públicos a través das bonificacións nas cotas a Seguridade Social, mentres argumentan que a caixa das pensións está quebrada.
  • Mantense a prevalencia do convenio estatal fronte aos convenios galegos e provinciais, e tamén que os convenios de empresa poidan empeorar os convenios sectoriais, agás nos salarios

Nin pacto social, nin reforma laboral!

Domingo 30 de xaneiro, mobilízate coa CIG!

Información tirada da web da CIG onde podes atopar máis información.

Mobilizacións 11 de decembro. Eólica así non. Na defensa das montañas

O vindeiro 11 de decembro, Día das Montañas, a coordinadora “Eólica Así Non” promoverá unha mobilización descentralizada por áreas xeográficas especialmente afectadas pola actual vaga eólica, desta volta, co obxectivo de dar especial visibilidade ás plataformas e colectivos da veciñanza que viven nos territorios máis directamente afectados por esta enxurrada incesante de proxectos eólicos. Ler máis

A CIG mobilizarase o 1 de decembro para que a clase traballadora non pague a saída da crise

A CIG convoca, para o 1 de decembro, mobilizacións en comarcas e vilas porque, camiño do final do ano, os orzamentos do Estado e da Xunta confirman o que desde a central sindical se viña advertindo: que estamos ante unha profunda crise que se multiplicou coa pandemia e que, para afrontala, nin a Xunta de Galiza nin o goberno do Estado están a adoptar as medidas necesarias para que non sexan, unha vez máis, a clase traballadora e o pobo galego quen a paguemos.

MOBILIZACIÓNS

  • Vigo, 11:00h. saída da sede provincial do SEPE (rúa Canovas del Castillo).
  • Pontevedra, 11:00h. saída do Edificio da Xunta (rúa María Victoria Moreno).
  • Ferrol, 12:00h. saída da Tesourería do INSS.
  • A Coruña, 11:30h saída do Edif Administrativo de Monelos (rúa Vicente Ferrer).
  • Lugo, 11:00h saída do Edificio do INSS (Av. Madrid).
  • Ourense, 10:30h saída da Subdelegación do Goberno.
  • Verín, 12:00h Praza do Concello
  • O Barco, 12:00h Praza do Concello
  • Compostela, 12:00h desde o Pazo de Raxoi (Presidencia da Xunta).

Polo aumento dos salarios

O secretario xeral da CIG, Paulo Carril, denuncia que a imparábel escalada da factura eléctrica “está a provocar estragos nas economías familiares, na actividade económica e na industrial, mentres o oligopolio enerxético acumula cada vez máis beneficios”. Unha situación que está provocando o incremento dos prezos de todos os produtos, nomeadamente dos básicos: a bolsa da compra ou a gasolina que son precisamente os que consume a clase traballadora.

Entrementres, os salarios non soben na mesma medida, o que, segundo Carril está a colocar nunha “situación crítica” á xa empobrecida clase traballadora, “facendo máis real que nunca aquilo de que ter un traballo non garante unha viva digna”.

Na defensa do emprego e da industria

O secretario xeral da CIG advirte que os procesos de dixitalización e descarbonización están aumentando as ameazas económicas, industriais, sociais e laborais para o conxunto da clase traballadora e para o desenvolvemento soberano dos pobos e das nacións do mundo.

“O emprego é cada vez máis temporal e precario, como constata a EPA do terceiro trimestre, que demostra a escandalosa perda de postos de traballo na Industria e na Construción en Galiza. Un total de 8.800 menos a consecuencia do proceso de desmantelamento que sofren, de Norte a Sur, os nosos sectores produtivos”, afirma o secretario xeral da CIG.

Diante disto, nas concentracións demandarase tamén un verdadeiro Plan Galego de Recuperación económica, industrialización, creación de emprego digno, defensa dos servizos públicos e dos dereitos laborais e sociais que garanta o dereito a vivir e traballar dignamente na nosa terra.

Pola derrogación das reformas laborais

A CIG vén demandando a derrogación da reforma laboral desde que se aprobou. Porén, e malia as promesas do goberno de coalición, segue vixente “mentres se monta un paripé mediático para manter despois os seus aspectos máis lesivos, cumprindo así os requisitos impostos pola UE para poder acceder aos famosos fondos NextGeneration, que están pensados ademais para destinar ás empresas e non ás persoas”, denuncia o secretario xeral da CIG.

Por unhas pensións dignas xa

Carril advirte tamén de que a reforma das pensións, en proceso de tramitación no Congreso, non só non derroga as de 2011, do PSOE, e 2013, do PP, senón que reafirma as daniñas medidas que “precisamente están a provocar que en Galiza miles de persoas xubiladas e pensionistas cobren pensións de miseria”.

Unha reforma que introduce ademais novas medidas como o aumento das cotizacións, que agrava aínda máis as nefastas consecuencias das anteriores reformas.

Unha situación “propiciada polos sindicatos estatais que participan en componendas co poder económico, no chamado diálogo social,desprestixiando a loita sindical; renunciando a dar a batalla ideolóxica e política necesaria para contribuír a un cambio real do actual modelo económico e social; validando as políticas dos gobernos e contribuíndo á desmobilización da clase traballadora galega”.

Por iso a CIG aposta pola mobilización por acumular “Forza para Avanzar” para dar unha resposta contundente a estes ataques e conquistar políticas alternativas coas que na Galiza poidamos exercer o dereito a vivir e traballar dignamente na Nosa Terra.

Información tirada da páxina web da CIG.

25 de novembro. Día Internacional para a Eliminación da Violencia contra as Mulleres

O nacionalismo galego desenvolve diversas campañas e actuacións vinculadas ao 25N e ao combate e á loita contra a violencia machista.

A CIG lanza unha campaña para identificar e combater a violencia contra as mulleres no traballo

A CIG desenvolverá este ano unha campaña centrada na violencia exercida no traballo contra as mulleres baixo o lema “É acoso, é violencia machista no traballo”. Unha violencia silenciada, da que apenas hai datos e ignoran as institucións. Esa mesmao día a Secretaría das Mulleres das CIG ten previstas asembleas de delegadas e delegados para abordar esta cuestión e convocará mobilizacións en cidades e vilas, todas ás 12:00 horas. O obxectivo é visibilizar “unha violencia silenciada, da que non se recollen datos nas estatísticas, nin se fan campañas institucionais para a toma de conciencia social”.

Así o explicou, en rolda de prensa, a secretaria das Mulleres, Nicolasa Castro Monteiro, quen sinalou que no Macroinquérito elaborado en 2019 pola Delegación do Goberno contra a Violencia de Xénero “non se aborda de forma específica a violencia no traballo” e só se indica que de entre as 9.568 mulleres maiores de 16 anos, o 6,6 % sufriron violencia sexual no traballo e que o 17,3% identifican o agresor como persoa do entorno laboral.

A estes datos engadiu os extraídos pola Axencia de Dereitos Fundamentais da Unión Europea, que realizou un inquérito a 42.000 mulleres de 28 Estados, das que o 55% foron vítimas de acoso sexual ao menos 1 vez desde os 15 anos. Un estudo do que se tira que o 32% destes acosos sucederon no contorno laboral e que o 90% das persoas acosadas no traballo son mulleres.

A secretaria das Mulleres da CIG advertiu que as denuncias por acoso son mínimas, xa que o 72% das afectadas non pon en coñecemento da empresa a situación que está padecendo. “A inmensa maioría das traballadoras optan por calar, por medo a non ser cridas, a represalias e mesmo ao despido”.

A este respecto recolleu os datos tirados do informe de 2015 da Fundación Europea para a Mellora das Condicións de Vida e Traballo, que revela que no Estado español só se denuncia un 8% dos casos de acoso mentres que na UE a media é de 14,9%. “As empresas incumpren coa obriga de teren un protocolo para a prevención e tratamento do acoso” asegurou, incumprindo así a Lei de Igualdade, en vigor desde 2007.

Por iso, dada a gravidade da situación, Castro Monteiro adiantou que nas asembleas de delegadas e delegados que se convocarán o propio 25 de novembro, previas ás concentracións, “imos insistir na necesidade de pór en marcha as medidas necesarias para esixirmos a elaboración destes protocolos, a súa difusión e os mecanismos tanto preventivos como de resolución de denuncias”. Isto xunto coa información de que se pode denunciar fóra da empresa, na IT ou nos xulgados.

Máis información da campaña da CIG

O BNG apela na súa campaña do 25N á implicación dos homes na loita contra todas as formas de violencia machista

O BNG presentou a súa campaña nacional con motivo do 25N,  coa que este ano quere “interpelar aos homes para que nos activemos na denuncia, no combate e na loita contra a violencia machista, en todas as súas manifestacións e en todas as súas formas”, segundo indicou o responsable de Comunicación, Xavier Campos. Explicou a escolla deste enfoque para a campaña porque a violencia machista é exercida por homes, dentro do sistema patriarcal no que vivimos e, “polo tanto, nós entendemos que o lóxico é que o papel dos homes sexa tamén posto no centro do debate e no centro das solucións a este problema”.

Tamén dende esta perspectiva, recordou que, habitualmente, as campañas tanto institucionais como doutro tipo, adoitan centrarse en “responsabilizar dalgunha maneira ás mulleres na denuncia e en poñer fin ao círculo dunha violencia que padecen, pero que non exercen”, mais o BNG entende que “este non pode ser o único enfoque”.

Logo de manifestar que “somos conscientes de que esta campaña poida resultar incómoda a algúns homes”, recalcou que se a violencia machista existe “é porque hai homes que a exercen e entendemos que chegou o momento de que nós deamos un paso adiante na loita contra esta violencia e que non hai escusas para non facelo”.

Así pois, a campaña, que se desenvolverá fundamentalmente nas Redes Sociais e na Internet dende hoxe e ata o propio 25N, reproducirá a través de distintas imaxes e contidos, situacións que todas e todos podemos recoñecer nas nosas contornas cotiás como diferentes manifestacións deste tipo de violencia -dende ás manifestacións físicas, ata aquelas de carácter psicolóxico ou simbólico- e que se da en todos os planos, tanto no afectivo ou sexual, como no sociolaboral.

Máis información da campaña do BNG

Animamos ao conxunto da militancia da UPG, simpatizantes  e ao conxunto do pobo galego a participar nestas campañas así como nós actos que a CIG e o movemento feminista galego ten convocado para este dia e que relacionamos a continuación:

Nesa xornada terán lugar, pola mañá, as convocadas pola CIG, nos seguintes lugares e horarios:

A Coruña Diante da Delegación do Goberno español 12.00 horas
Ferrol Diante do edificio da Xunta 12.00 horas
As Pontes Praza do Hospital 12.00 horas
Compostela Complexo advo. de San Caetano 12.00 horas
Ribeira Praza do Concello 12.00 horas
Pontevedra Diante da Subdelegación do Goberno español 12.00 horas
Vilagarcía de Arousa Diante do Servizo Galego de Colocación 12.00 horas
Vigo Diante do edificio da Xunta 12.00 horas
Lugo Diante da Subdelegación do Goberno español 12.00 horas
Ourense Diante da Subdelegación do Goberno español 12.00 horas

Pola tarde terán lugar as convocadas polo movemento feminista galego, contra a violencia machista e a necesidade de combater a xustiza patriarcal, nos seguintes lugares e horarios (tedes máis información, manifesto etc., en: http://feminismo.info/feminismo/blog/25n-combater-a-xustriza-patriarcal-para-acabar-coa-violencia-machista/ )

A Coruña 20.00 horas Manifestación desde o Obelisco
A Estrada 20.30 horas Diante do Concello
As Pontes 20.30 horas Praza do Hospital
Betanzos 20.00 horas Detrás do palco da música
Carballo 20.00 horas Praza do Concello
Carnota  19.30 horas Praza de Pedra
Catoira 20.00 horas Adro de Catoira
Cee 20.30 horas Praza 8 de marzo
Celanova 19.30 horas Praza Maior
Cervo 20.00 horas Praza dos Campos (San Cibrao)
Chantada 20.00 horas Praza do Cantón
Compostela 20.00 horas Praza 8 de marzo
Fene 17.00 horas Praza do Concello
Lalín 20.30 horas Km0
Lugo 19.30 horas Diante do Xulgado
Melide 20.00 horas Praza do Convento
Muros 20.00 horas Diante do Concello
O Porriño 20.00 horas Praza do Concello
Ordes 21.00 horas Alameda
Ourense 12.00 e 20.00 horas Pola mañá diante dos Xulgados novos e pola tarde Manifestación desde a Subdelegación do Goberno
Pontevedra 20.00 horas Peregrina
Val Miñor 20.00 horas Cruce da Ramallosa
Vigo 20.00 horas Manifestación desde Vía Norte
Vila de Cruces 20.30 horas Praza do Concello
Vilaboa 19.30 horas Diante do Concello
Vilagarcía 20.30 horas Praza de Galiza
Vilalba 20.30 horas Praza da Constitución