Día da clase Obreira Galega

Desde o ano 1972, o sindicalismo nacionalista celebra o 10 de Marzo, Día da Clase obreira Galega. Nesta data conmemoramos as loitas protagonizadas pola clase traballadora galega en 1972 durante as que foron asasinados en Ferrol, pola policía franquista, os traballadores da antiga Bazán, Amador e Daniel.

Loitas que comezaron en Ferrol no mes de marzo, e que meses despois se estenderon a Vigo, pola dignidade e pola liberdade, contra a precariedade das condicións de traballo, por salarios xustos e por defender a negociación colectiva en Galiza.

Este ano 2023 a Confederación Intersindical Galega, CIG, fai un chamamento a converter do 10 de Marzo unha xornada de mobilización en todas as comarcas de Galiza ante as amezas que temos por diante e ante a necesidade de continuar na resposta fronte a grave crise actual. Cunha especial atención a previsión por parte do goberno do estado de aprobar unha nova reforma das pensións, aumentando a 30 anos o período de cálculo, que suporá un novo recorte das contías de entre un 6% e un 8%, como o propio Banco de España recoñece.

Así pois animamos a participar nas mobilizacións que a CIG ten convocadas para este día nas comarcas galegas. Máis información na páxina web da CIG.