O pobo catalán a poucos días do histórico 1-O

Poble Lliure explica no Foro Internacionalista da UPG como encara o soberanismo a celebración do referendo de autodeterminación

O Foro Internacionalista da Unión do Povo Galego realizou dúas palestras arredor do procés soberanista en curso na Catalunya. Sob o título “Catalunya camiño da independencia”, as charlas tiveron lugar na cidade de Vigo e en Santiago de Compostela, os días 27 e 28 de setembro respeitivamente. Nelas tomou parte Arnau Comas, membro de Poble Lliure, organización política integrada na Candidatura de Unitat Popular (CUP). Comas, ten unha importante traxectoria no ámbito municipal e desempeña na actualidade como concelleiro en Sant Esteve de Palautordera . Canda Comas, en Vigo interviu o responsábel de Relacións Internacionais da UPG, Duarte Correa, e o secretario xeral, Néstor Rego, fixo o propio en Santiago. Ambos os dous eventos concitaron unha importante audiencia, enchendo os aforos dos locais nos que se desenvolveron.

Con estas palestras a UPG quixo traer a Galiza a perspectiva coa que o soberanismo catalán encara a celebración do referendo de autodeterminación convocado para este domingo, 1 de outubro. Nese sentido, púxose en valor o esforzo realizado por Poble Lliure para participar nun momento no que o procés encara a súa fase final.

Proceso popular

Na súa intervención, Arnau Comas principiou realizando unha contextualización histórica. A este respeito situou o inicio do actual proceso soberanista en 2009, coincidindo co primeira consulta popular decorrida en Arenys de Munt. A maioría absoluta atinxida polo Partido Popular a nivel estatal en 2004, no segundo mandato de José María Aznar, traduciuse nunha ofensiva contra Catalunya deixando patente que no “proxecto nacional español” non cabía ningún encaixe para as nacións sen Estado que ultrapasase o actual marco autonómico. Esa ofensiva recentralizadora, foi seguida polo retallamento da reforma estatutaria, pactada por PSC, ICV e mais ERC, visando a resistencia frontal das forzas hexemónicas no Estado a modificar o deseño político nacido da chamada Transición. Por derradeiro, a partir do retorno do PP, en 2012, ao goberno español, a opción da “reforma” quedaba definitivamente abortada.

Para Comas, a chave para entender o salto cualitativo do independentismo na Catalunya é a converxencia dunha triple crise: a crise económica, iniciada en 2007 e que se traduce nun grave retroceso social, e no empobrecemento de importantes capas da clase traballadora e de sectores intermedios; a crise democrática, que xorde á calor das protestas sociais diante da crise e das políticas de recorte impostas polo neoliberalismo, e que supón un cuestionamento ao réxime político español nacido no 78; e mais a crise nacional, ao se constatar a inviabilidade de ningún avanzo dentro das costuras “autonómicas e da Constitución”. Diante desa tripla crise, o acerto do soberanismo, segundo Comas, foi formular o proxecto nacional catalán como resposta integral. “A independencia era a alternativa diante do problema social, da crise democrática e da crise nacional en Catalunya”, explicou.

Un dos aspectos nos que enfatizou a explicación foi o do carácter netamente popular do procés soberanista. “É certo que a diferenza das revolucións clásicas este proceso de ruptura ten un suxeito máis disperso, pero a transversalidade que o empurra é unha transversalidade popular, entre as clases populares de Catalunya”, sinalou. A este respeito, valorizou que os sectores intermedios, de pequena ou mediana burguesía, que fan parte do proceso se ben interveñen nel e teñen unha “incidencia limitada” non o dirixen nin o orientan.

Salientou tamén o alcance masivo e continuado da mobilización popular durante todo o proceso. “Podemos estar diante da mobilización popular de maior alcance, polo nivel de participación e de extensión no tempo, nos últimos 50 ou 60 anos en Europa”, afirmou. A chave para lograren ese nivel de participación e mobilización foi, na súa opinión, a aposta estratéxica en vertebrar espazos populares e autónomos, como a Assemblea Nacional Catalana, que serviron de motor do procés. Comas, recoñeceu que a dimensión masiva atinxida sorprendeu mesmo no seo da esquerda independentista. “A quen vivimos os procesos mobilizadores dos 90 resultábanos difícil comprender como en tan poucos anos o pobo catalán dera este salto”.

Acerto da posición pola ‘ruptura’

O desenvolvemento do procés visa, na opinión de Poble Lliure, o acerto das posicións que na altura da fin da Ditadura propugnaban a necesidade dunha ruptura democrática en contra do pacto da Transición. Unha posición que tanto a esquerda independentista catalá como o nacionalismo galego partillan, e que foi defendida con firmeza pola Unión do Povo Galego.

Expectativas

En relación ás expectativas coas que enfrontan a realización do referendo do 1-O, Comas puxo de relevo que o agravamento da ofensiva represiva –que tivo como cénit as detencións de 14 altos cargos do Govern a pasada terza feira, 20 de setembro–, marcou un punto de inflexión. “A represión do Estado provocou unha maior resposta social e popular como demostran as masivas mobilizacións dese día e dos seguintes. Claramente Madrid deu un paso en falso”.

No entanto, non é claro até onde chegará a pretensión do goberno español de impedir que o pobo catalán poida decidir libre e democraticamente ese futuro. “Do que estamos certos é de que hai unha clara vontade e moita determinación popular para votar. O día 1 de outubro é clave, porque vai determinar quen controla Catalunya: o goberno do Estado ou o movemento popular e as institucións catalás”.

Foro internacionalista

O Foro Internacionalista é unha iniciativa da UPG posta en marcha este ano que persegue crear un espazo de debate arredor da realdiade internacional, poñendo o foco sobre todo nos procesos populares de carácter antiimperialista e máis nos movementos de liberación nacional.

A UPG reiterou nestas palestras o pleno apoio do Partido e do conxunto do movemento nacionalista galego ao soberanismo catalán.

Secretariado Político da UPG valoriza recoñecemento da figura de Bautista Álvarez e agradece mensaxes de condolencia

Na reunión realizada na pasada quinta feira, 21 de setembro, o Secretariado Político da UPG acordou trasladar publicamente o agradecemento a todas as persoas, colectivos e forzas políticas que nos fixeron chegar mensaxes de condolencia polo pasamento do noso camarada e ex-presidente, Bautista Álvarez.

O Secretariado Político constata o enorme recoñecemento social e político a unha persoa que dedicou toda a súa vida á causa da liberación nacional e social da Galiza e que o fixo, ademais, con intelixencia, acerto, coherencia política e entrega xenerosa. Foron numerosas as entidades, colectivos, forzas sociais, sindicais e políticas e persoas a título individual que recoñeceron publicamente a traxectoria política de Bautista Álvarez.

É de salientar, aliás, que as mostras de condolencia e solidariedade chegaron, para alén do próprio País, do ámbito internacional, por parte de partidos comunistas, organizacións antiimperialistas e medios populares de diferentes partes do mundo, -do Brasil a Cataluña, de Portugal a Palestina, de Bretaña a EuskalHerría-, cun recoñecemento expreso do contributo político de Bautista Álvarez para a causa internacional da emancipación dos traballadores e traballadoras e da liberdade dos povos.

O Secretariado Político, pola súa parte, asumiu o compromiso de continuar a traballar na difusión da obra e na valorización da figura política de Bautista Álvarez, entendendo que constitúe todo un símbolo do povo galego organizado que non deixará de loitar pola liberdade até a conquistar e, por tanto, tamén un exemplo para continuar a causa pola independencia nacional da Galiza e o socialismo.

Cataluña, a camiño da independencia. Novos actos do Foro Internacionalista da UPG

Co obxectivo de coñecermos mellor a situación política que se está a vivir en Cataluña e de apoiar o dereito democrático dos povos á autodeterminación, a vindeira semana desenvolveranse dous  actos no marco do Foro Internacionalista da UPG.  Os actos, sob o lema xenérico de “Cataluña, a camiño da independencia”  decorrerán en Vigo e Compostela.  Na cidade de Vigo será nesta próxima cuarta feira,  27 de setembro, no Salón de Actos do Colexio Oficial de Arquitectos de (Rúa do Doutor Cadaval, nº5) ás 20:30 horas. En Compostela decorrerá na quinta feira, 28 de setembro, na Aula nº 1 da Facultade de Filosofía (Praza de Mazarelos) tamén ás 20:30 h.

En ambos os actos contaremos coa presenza de Arnau Comas, militante de Poble Lliure, partido que apioa a Candidatura de Unitat Popular (CUP) da que é concelleiro. Nesta forza política desenvolveu funcións de dirección nacional na area de política institucional e municipal, formando parte da súa Comisión Permanente.  Tamén participarán nos actos Duarte Correa, Secretario de Relacións Internacionais da UPG e Néstor Rego, Secretario Xeral da UPG.

Agardámosvos nestes interesantes actos do noso Foro Internacionalista para coñecer de primeira man a situación actual e perspectivas do proceso de autodeterminación do povo catalán.

Condenamos o Estado de excepción en Cataluña e chamamos a defender as liberdades

A actuación do aparello do rexime español nesta cuarta feira (20) en Cataluña, co asalto a sedes do Goberno e detención de altos cargos da Generalitat, traspasou todas as liñas vermellas do punto de vista democrático e resulta nun auténtico golpe de estado contra as institucións e o autogoberno de Cataluña. O Estado español tenta por todos os medios coercitivos e violentos, mesmo se foren ilegais de acordo coa propia lexislación española, trabar a vontade democrática do povo catalán de exercer o dereito de autodeterminación e conquistar a independencia.

Esta actuación pón en evidencia o verdadeiro carácter autoritario e antidemocrático do Estado español. Ao longo das últimas décadas temos denunciado permanentemente que o sistema político español saído da Transición e da Constitución de 78 non era democrático. Agora non só non o é senón que tampouco o parece. O proceso de independencia de Cataluña deixou ao descuberto a verdadeira face da ‘democracia española’. A negación de dereitos e liberdades fundamentais é a receita con que o rexime español responde ás ansias de liberdade dos pobos.

Non é compatíbel cos mínimos principios democráticos a criminalización do dereito de voto, a persecución de cargos públicos por defenderen ese dereito, a prohibición de actos, o fechamentos de webs, o ataque a medios de comunicación, o secuestro de revistas, cartaces ou urnas… Non pode considerarse democrático un Estado que conculca os dereitos básicos e a liberdade de expresión, de opinión, de reunión, de información e de decisión a través do voto.

Sabemos que o ataque aos dereitos e liberdades en Cataluña é un ataque aos dereitos e liberdades de todas as persoas que vivimos no Estado español e tamén ao de todas as nacións que aínda facemos parte del e aspiramos a ser libres. Por iso chamamos á mobilización para defender a democracia e o dereito dos povos a decidir, a exercer a autodeterminación e a se constituír en Estados soberanos e independentes. Hoxe, defender a liberdade de Cataluña é tamén defender a liberdade da Galiza e de todas as persoas.

Expresamos o noso total apoio ao povo catalán que está na rúa manifestando a súa soberanía, ao Goberno de Cataluña, así como a todas as forzas políticas independentistas que están a ser atacadas polo rexime español. Pola nosa parte, reafirmamos -máis unha vez- o compromiso de continuar reforzando a auto-organización do povo galego e de seguir a traballar pola ruptura democrática no noso país até conquistar a independencia da nosa nación e constituír o noso propio Estado soberano, a República da Galiza.

Até a vitoria sempre, camarada Bautista Álvarez

Centos de camaradas, compañeiros e compañeiras, amigos e amigas despedimos o domingo ao noso camarada Bautista Álvarez na terra que o veu nacer,  San Cibrao de Las en San Amaro.

Nun sincero e emotivo acto de tributo recoñeceuse a figura e o traballo dun home irrepetíbel e fundamental na construción da Galiza actual. Fundador da UPG, histórico dirixente nacionalista e figura central na historia política recente da nosa nación e sen o que sería imposíbel entender o movemento nacionalista e as análises e conceptualizacións que ese movemento construíu durante os últimos 50 anos.

Ao pé do castro de San Cibrao de Las desenvolveuse o acto de despedida ao camarada e amigo. Iniciou o acto o cantor Roberto Sobrado interpretando o clásico de Suso Vaamonde “ Volvín á terra pero perdín o amor” e a emoción encheu o acto cando as voces cantaron ao coro o retrouso da canción “como ei vivir mañá sen a luz túa”. Presentou o acto Montse Nóvoa, secretaria de zona da UPG en Ourense, cunha sentida intervención que deu paso aos distintos oradores e oradoras.

Lembrou Chema Ferreiro, do BNG da comarca do Carballiño, os anos nos que compartiron escano no Parlamento Galego e a súa veciñanza na comarca. Francisco Rodríguez destacou o compromiso político e o rigor intelectual de quen foi presidente da UPG desde 1977 até 2008, e o compromiso de todos e todas en continuar o traballo de lograr de Galiza un país normalizado. Lois Diéguez, antes da dar lectura a un poema en memoria de Bautista Álvarez, recordou a súa expulsión xunto á de Bautista e Claudio López dos escanos que no Parlamento da Galiza tiña logrado o nacionalismo galego e a significación de aquel momento político. Pilar García Negro lembrou a aquel neno de aldea que no Seminario de Ourense descubre na lectura de Castelao a existencia da nación negada e desde aquela “consagrou a súa biografía á causa da dignidade, da liberdade e dos dereitos da Galiza, a erguer un patriotismo firme e sen claudicacións, a compor, en fin, unha outra imaxe do galego político, do nacionalista entregado a unha misión que precisa aínda de todas e de todos nós, se non queremos que a nación sucumba na maré española e global”.

A Portavoz Nacional do BNG, Ana Pontón, non puido conter a emoción cando lembrou os seus inicios no compromiso militante e como alí coñeceu a Bautista e o seu exemplo, compromiso e presenza xenerosa sempre que se precisaba. Sinalou o seu papel como clave para a existencia do BNG e recoñeceu “toda unha vida de intelixencia e paixón ao servizo deste proxecto, na que nunca desfaleceu e nunca deixou de acreditar no país”.

Néstor Rego, Secretario Xeral da UPG, pechou as intervencións lembrando o contributo teórico de Bautista a construción dunha doutrina liberadora para Galiza cimentada na propia tradición nacionalista galega e nun marxismo leninismo adaptado á realidade galega. Destacou a figura dun home fundamental non só para o noso Partido, se non para o conxunto do pobo galego, e tamén emocionado afirmou que “as persoas que entregan a súa vida a unha causa non morren nunca, e Bautista acompañaranos sempre até acadar o obxectivo da República galega”

Tras o canto do noso himno nacional, os centos de persoas congregadas ao pé do Castro de San Cibrao de Las despedimos ao camarada Bautista Álvarez, á camiño do seu enterro no cemiterio da súa parroquia natal, ao berro de: ”BAUTISTA ÁLVAREZ, PATRIOTA GALEGO!”.

Bautista Álvarez, referente fundamental da loita pola soberanía, estará sempre connosco

Na hora do pasamento do noso camarada Bautista Álvarez, o Comité Central da Unión do Povo Galego (UPG) traslada o pesar á súa familia e a toda a familia nacionalista ao tempo que expresa o recoñecemento a un home excepcional, a unha persoa que entregou a súa vida á causa da liberación nacional e social do povo galego e que o fixo con lucidez, con determinación e con coherencia até o final.

Patriota Galego e comunista exemplar, Bautista Álvarez uniuse de moi novo á loita en defensa da Galiza e contra a ditadura franquista e foi un dos principais impulsores da reorganización do nacionalismo galego nos anos 60 que deu lugar á fundación da Unión do Povo Galego en 1964. Participou activamente no traballo clandestino, en condicións durísimas que lle supuxeron pasar en diversas ocasións polos cárceres franquistas, para asentar o Partido e nacionalismo entre o povo traballador galego e para lograr a expansión da conciencia nacional e da capacidade de actuación política nacionalista na sociedade galega.

En 1977, no I Congreso da UPG -realizado aínda na semi-clandestinidade- foi electo Presidente do Partido, cargo que ocupou de maneira ininterrumpida até o XII Congreso, realizado en 2008. Foi tamén dirixente do BNG desde a fundación da Frente nacionalista en 1982, ao que representou no Parlamento da Galiza durante anos. Nas primeiras eleccións, realizadas a 20 de Outubro de 1981, sae electo deputado pola circunscrición da Coruña, sendo expulsado do Parlamento, xunto cos compañeiros da coalición electoral Bloque (AN-PG/UPG)-PSG, Lois Diéguez Vázquez e Claudio López Garrido, por se negar a prestar xuramento á Constitución española de 1978. Volverá a resultar electo deputado pola circunscrición de Pontevedra na IIIª, IVª, Vª e VIª lexislatura, de 1989 até 2005.

Dirixente de firmes conviccións patrióticas e de sólida formación marxista, as súas achegas foron fundamentais para ir conformando as análises e as alternativas políticas do nacionalismo contemporáneo. O seu contributo teórico ficou recollido en 3 volumes das Obras Completas, editado pola Fundación Bautista Álvarez. Grande coñecedor da cultura e da literatura galega, á que contribuíu como escritor, o seu estilo singularizou con personalidade propia a oratoria e a literatura política da Galiza contemporánea.

No momento en que Bautista Álvarez nos abandona fisicamente, a Unión do Povo Galego quere destacar a coherencia política que marcou toda a súa vida en defensa da causa da independencia nacional da Galiza e o socialismo. Temos a certeza de que as persoas como Bautista nunca morren, pois permanecen na memoria e no corazón do povo, no corazón da nosa Patria. Até a vitoria sempre, camarada.

Comité Central da UPG

Galiza con Catalunya, a súa é tamén a nosa loita

O proceso soberanista en pleno desenvolvemento na Catalunya, para alén de representar un espazo de oportunidade maiúsculo para a conquista polo povo catalán da súa plena soberanía nacional, está a verificar as teses e análises que o nacionalismo galego no seu conxunto, e a Unión do Povo Galego en particular, temos realizado a respeito do carácter irreformábel do Estado español e do esgotamento do modelo autónomico vixente. Ler máis

O nacionalismo pon na picota a herdanza do franquismo

A permanencia nas mans da familia Franco das propiedades espoliadas durante os anos da guerra e da ditadura é todo un símbolo de como o actual réxime político español, saído da chamada ‘transición’, non rompe co esencial -nin sequera no plano emblemático- da herdanza da ditadura franquista. O Estado español mantén o seu carácter autoritario, unitario e colonialista.

Ler máis

Congreso das FARC-EP: Declaración das organizacións internacionais presentes

Por iniciativa da UPG todas as organizacións internacionais presentes en Bogotá no Congreso Nacional das “FARC-EP Forzas Armadas Revolucionarias de Colombia – Exército do Pobo” asinaron unha declaración de apoio ao proceso de paz en Colombia. Publicamos a continuación o texto íntegro:


As organizacións internacionais políticas e sociais, presentes no Congreso Nacional das “FARC-EP Forzas Armadas Revolucionarias de Colombia – Exército do Pobo”, celebrado na cidade de Bogotá desde o 27 ao 31 de agosto de 2017, co lema “Por un Goberno de Transición para a reconciliación e a paz”, declaramos o seguinte:

01.- Agradecemos ás FARC-EP ternos invitado a estar presentes en tan histórico e transcendental Congreso.

02.- Agradecemos igualmente a excelente acollida e atención de que fomos obxecto durante a nosa estadía.

03.- Celebramos con entusiasmo a conversión das “Forzas Armadas Revolucionarias de Colombia-Exército do Pobo” nun partido político co nome de “FARC – Forza Alternativa Revolucionaria do Común”.

04. Consideramos que esta decisión é un paso crucial na consecución dunha paz estábel e duradeira en Colombia.

05.- Afirmamos que a FARC, un novo partido para unha nova Colombia, é un importantísimo instrumento para conseguir unha Colombia socialmente xusta, inclusiva e igualitaria.

06. Estamos convencidos de que o nacemento da FARC reforzará as loitas contra o imperialismo, o capitalismo e as políticas de inxerencia en Latinomérica e no Caribe.

07. Condenamos enerxicamente os atrasos e incumprimentos sistemáticos do goberno colombiano na implementación dos Acordos de Paz. Do mesmo xeito, condenamos as trabas, argucias e propostas coas que as Institucións do Estado pretenden paralizar a implementación e, nalgúns casos, terxiversar e desnaturalizar o contido dos Acordos de Paz.

08.- Esiximos do Goberno e das Institucións do Estado colombiano o cumprimento íntegro, estrito e sen dilacións dos contidos do Acordo. En particular, esiximos a liberación inmediata de todas as exguerrilheiras e todos os exguerrilheros que continúan en prisión.

09.- Esiximos ao goberno colombiano que actúe con toda firmeza para ponher punto final á existencia do paramilitarismo, condición indispensábel para a instauración da paz en Colombia.

10.- Demandamos do goberno estadounidense a posta en liberdade do exguerrilheiro Simón Trinidad, inxustamente preso nos cárceres dese País.

11. Comprometémonos a presionar aos nosos gobernos para que utilicen todos os medios diplomáticos ao seu alcance co fin de demandar do goberno colombiano o cumprimento dos Acordos de Paz.

12 Comprometémonos a facer un seguimento permanente da implementación dos Acordos, canalizando o noso rexeitamento e protesta polos incumprimentos a través das embaixadas colombianas nos nosos países.

13. Seguiremos apoiando as negociacións de paz do goberno co ELN e outras expresións da insurxencia, co desexo de que moi pronto a paz definitiva e total se estenda por toda Colombia.

En Bogotá, a 1 de setembro de 2017

 

A UPG participa no congreso constitutivo do partido político creado polas FARC en Colombia

De 26 de agosto a 1 de setembro decorrerá  na cidade de Bogotá o Congreso Fundacional do novo partido político en que se transformarán as Forzas Armadas Revolucionarias de Colombia-Exército do Povo (FARC-EP), partido político froito dos acordos de Paz, asinados na Habana a 24 de novembro de 2016 entre a guerrilla e o goberno colombiano.

Neste importante Congreso que supón unha nova etapa na traxectoria revolucionaria de loita dos membros das FARC-EP estarán presentes delegacións de organizacións políticas e sociais de todo o mundo, que coa súa presenza mostran o seu apoio ao proceso de paz e á loita das FARC e da esquerda colombiana.

O noso partido estará presente neste importante congreso por medio do camarada Moncho Boán, membro da Secretaría de RR.II. da UPG, que trasladará aos e ás congresistas o apoio e solidariedade da militancia da UPG e o desexo de que este novo instrumento partidario do que decidiron dotarse, permita avanzar na loita social e política por unha Colombia libre do xugo imperialista, verdadeiramente soberana e na que sexa posíbel rematar coa explotación e avanzar  na superación da orde social capitalista e na construción dunha nova sociedade.