Archive for category: Internacional

A actuación do aparello do rexime español nesta cuarta feira (20) en Cataluña, co asalto a sedes do Goberno e detención de altos cargos da Generalitat, traspasou todas as liñas vermellas do punto de vista democrático e resulta nun auténtico golpe de estado contra as institucións e o autogoberno de Cataluña. O Estado español tenta por todos os medios coercitivos e violentos, mesmo se foren ilegais de acordo coa propia lexislación española, trabar a vontade democrática do povo catalán de exercer o dereito de autodeterminación e conquistar a independencia.

Esta actuación pón en evidencia o verdadeiro carácter autoritario e antidemocrático do Estado español. Ao longo das últimas décadas temos denunciado permanentemente que o sistema político español saído da Transición e da Constitución de 78 non era democrático. Agora non só non o é senón que tampouco o parece. O proceso de independencia de Cataluña deixou ao descuberto a verdadeira face da ‘democracia española’. A negación de dereitos e liberdades fundamentais é a receita con que o rexime español responde ás ansias de liberdade dos pobos.

Non é compatíbel cos mínimos principios democráticos a criminalización do dereito de voto, a persecución de cargos públicos por defenderen ese dereito, a prohibición de actos, o fechamentos de webs, o ataque a medios de comunicación, o secuestro de revistas, cartaces ou urnas… Non pode considerarse democrático un Estado que conculca os dereitos básicos e a liberdade de expresión, de opinión, de reunión, de información e de decisión a través do voto.

Sabemos que o ataque aos dereitos e liberdades en Cataluña é un ataque aos dereitos e liberdades de todas as persoas que vivimos no Estado español e tamén ao de todas as nacións que aínda facemos parte del e aspiramos a ser libres. Por iso chamamos á mobilización para defender a democracia e o dereito dos povos a decidir, a exercer a autodeterminación e a se constituír en Estados soberanos e independentes. Hoxe, defender a liberdade de Cataluña é tamén defender a liberdade da Galiza e de todas as persoas.

Expresamos o noso total apoio ao povo catalán que está na rúa manifestando a súa soberanía, ao Goberno de Cataluña, así como a todas as forzas políticas independentistas que están a ser atacadas polo rexime español. Pola nosa parte, reafirmamos -máis unha vez- o compromiso de continuar reforzando a auto-organización do povo galego e de seguir a traballar pola ruptura democrática no noso país até conquistar a independencia da nosa nación e constituír o noso propio Estado soberano, a República da Galiza.

Por iniciativa da UPG todas as organizacións internacionais presentes en Bogotá no Congreso Nacional das “FARC-EP Forzas Armadas Revolucionarias de Colombia – Exército do Pobo” asinaron unha declaración de apoio ao proceso de paz en Colombia. Publicamos a continuación o texto íntegro:

As organizacións internacionais políticas e sociais, presentes no Congreso Nacional das “FARC-EP Forzas Armadas Revolucionarias de Colombia – Exército do Pobo”, celebrado na cidade de Bogotá desde o 27 ao 31 de agosto de 2017, co lema “Por un Goberno de Transición para a reconciliación e a paz”, declaramos o seguinte:

01.- Agradecemos ás FARC-EP ternos invitado a estar presentes en tan histórico e transcendental Congreso.

02.- Agradecemos igualmente a excelente acollida e atención de que fomos obxecto durante a nosa estadía.

03.- Celebramos con entusiasmo a conversión das “Forzas Armadas Revolucionarias de Colombia-Exército do Pobo” nun partido político co nome de “FARC – Forza Alternativa Revolucionaria do Común”.

04. Consideramos que esta decisión é un paso crucial na consecución dunha paz estábel e duradeira en Colombia.

05.- Afirmamos que a FARC, un novo partido para unha nova Colombia, é un importantísimo instrumento para conseguir unha Colombia socialmente xusta, inclusiva e igualitaria.

06. Estamos convencidos de que o nacemento da FARC reforzará as loitas contra o imperialismo, o capitalismo e as políticas de inxerencia en Latinomérica e no Caribe.

07. Condenamos enerxicamente os atrasos e incumprimentos sistemáticos do goberno colombiano na implementación dos Acordos de Paz. Do mesmo xeito, condenamos as trabas, argucias e propostas coas que as Institucións do Estado pretenden paralizar a implementación e, nalgúns casos, terxiversar e desnaturalizar o contido dos Acordos de Paz.

08.- Esiximos do Goberno e das Institucións do Estado colombiano o cumprimento íntegro, estrito e sen dilacións dos contidos do Acordo. En particular, esiximos a liberación inmediata de todas as exguerrilheiras e todos os exguerrilheros que continúan en prisión.

09.- Esiximos ao goberno colombiano que actúe con toda firmeza para ponher punto final á existencia do paramilitarismo, condición indispensábel para a instauración da paz en Colombia.

10.- Demandamos do goberno estadounidense a posta en liberdade do exguerrilheiro Simón Trinidad, inxustamente preso nos cárceres dese País.

11. Comprometémonos a presionar aos nosos gobernos para que utilicen todos os medios diplomáticos ao seu alcance co fin de demandar do goberno colombiano o cumprimento dos Acordos de Paz.

12 Comprometémonos a facer un seguimento permanente da implementación dos Acordos, canalizando o noso rexeitamento e protesta polos incumprimentos a través das embaixadas colombianas nos nosos países.

13. Seguiremos apoiando as negociacións de paz do goberno co ELN e outras expresións da insurxencia, co desexo de que moi pronto a paz definitiva e total se estenda por toda Colombia.

En Bogotá, a 1 de setembro de 2017

Diante da tentativa de falsificación da historia que supón o “Día Europeo conmemorativo das vítimas dos réximes totalitarios” a UPG asinou xunto con máis de 70 partidos comunistas e obreiros de todo o mundo a seguinte declaración:

Os Partidos Comunistas e Obreiros denuncian o acto anti-comunista organizado pola presidencia estoniana da Unión Europea

Os Partidos Comunistas e Obreiros condenan o acto anti-comunista organizado pola presidencia estoniana da Unión Europea, no marco do chamado “Día Europeo conmemorativo das vítimas dos réximes totalitarios”, como a Unión Europea intentou establecer o día 23 de agosto nos últimos anos. A reunión anti-comunista pretende calumniar o socialismo e os seus logros sen precedentes para os traballadores, falsificar a Historia, equiparar inaceptabelmente e sen base histórica o comunismo co monstro do fascismo e as súas atrocidades. A equiparación provocativa do fascismo co comunismo significa exonerar o fascismo e o seo que o xera e o alimenta, é dicir o sistema explotador capitalista. É por iso que mentres os comunistas están sendo perseguidos e condenados, mentres os partidos comunistas en varios países da UE están sendo prohibidos, ao mesmo tempo renden honores e proporcionan pensións aos colaboradores dos nazis e aos seus descendentes políticos.

Os traballadores e os pobos xa poden tirar conclusións sobre o feito de que a intensificación do anti-comunismo sinala o fortalecemento das medidas antipopulares, a restrición dos dereitos obreiros populares, o desencadeamento de novas guerras imperialistas.

A luz da verdade brillará. Cen anos despois da Gran Revolución Socialista de Outubro a superioridade do sistema socialista non se pode ocultar por moitas toneladas de lama que arroxan. Os povos a través da súa loita atoparán o camiño cara a unha sociedade onde a riqueza pertenza aos que a producen, cara ao socialismo-comunismo.

O listado de asinantes pode consultarse no seguinte enlace

http://es.kke.gr/en/articles/The-Communist-and-Workers-Parties-denounce-the-anti-communist-fiesta-being-organized-by-the-Estonian-Presidency-of-the-EU/

A condena de Luís Inácio Lula da Silva a nove anos e medio de cárcere non é unha actuación xudicial, é un paso máis n intento de consolidación do golpe de estado institucionalque retirou da presidencia do Brasil a Dilma Rousseff, un golpe posto en marcha pola dereita política e económica brasileiras, golpe enmarcado na estratexia imperialista para trabar os procesos progresistas e revolucionarios que en América Latina plantan cara ao neoliberalismo. Ler máis →

Diante da detención no día de onte da deputada e dirixente da Fronte Popular de Liberación de Palestina Khalida Jarrar e de outr@s activistas palestinos, a UPG denuncia unha vez máis a política xenocida do estado israelí contra o povo palestino, unha actuación que Israel executa con apoio explícito duns gobernos occidentais que miran cara outro lado. Ler máis →