A UPG saúda o novo Presidente cubano Miguel Díaz- Canel con motivo da súa elección
Con motivo da elección por parte da Asemblea Nacional do Poder Popular de Cuba de Miguel Díaz- Canel como novo Presidente do Consello de Estado da República de Cuba, a UPG enviolle comunicación para trasladarlle o noso saúdo e parabéns pola súa elección- O texto da comunicación é o seguinte:
Estimado compañeiro:
Con motivo da súa elección, por parte da Asemblea Nacional do Poder Popular, como Presidente do Consello de Estado da República de Cuba, quero facerlle traslado do saúdo e dos parabéns do Comité Central e de toda a militancia da Unión do Povo Galego.
A súa elección é un novo paso na heroica loita do seu pobo por manter unha Cuba independente e camiñar na ruta de construción do socialismo. E na importante responsabilidade que vostede vén de asumir toma o relevo de históricos patriotas e revolucionarios como os compañeiros Fidel e Raúl Castro.
Son moitos os retos que Cuba ten por diante, pero estamos certos de que a súa firmeza e o apoio dun pobo comprometido coa súa patria e coa súa revolución, permitirán avanzar cara aos obxectivos marcados.
Pola nosa banda, tendo en conta os históricos lazos que unen aos pobos galego e cubano e a estreita relación entre o PCC e a UPG, só queda transmitirlle o noso apoio solidario na nova función que asume.
Viva a Solidariedade entre os pobos!
Viva Cuba Socialista!
Compostela; 22 de abril de 2018
Néstor Rego Candamil
Secretario Xeral da UPG